ஏரும் போரும் எம் குலத்தொழில்...! அருந்திறல் வீரர்க்கும் பெருந்திறல் உழவர்க்கும் வருந்தகைத்தாகும் மள்ளர் என்னும் பெயர்.-திவாகர நிகண்டு- செருமலை வீரரும் திண்ணியோரும் மருத நில மக்களும் மள்ளர் என்ப-பிங்கல நிகண்டு சேர சோழ பாண்டியமூவேந்தர் மரபினர் யாம்.

புதன், 29 ஜனவரி, 2014

பழனிபாபா - வாசிக்கப்படவேண்டிய வரலாறு

எண்பதுகளின் துவக்கத்திலிருந்து தொண்ணூறுகளின் மத்தி வரை ஆளும் வர்க்கதிற்கும் அடக்குமுறையாளர்களுக்கும் தூக்கம் கெடுத்த சிம்மசொப்பனம்...
தனக்கென பெரிய அமைப்பில்லை... தனியான அலுவலகமில்லை... பின்பற்றி வரக்கூடிய தொண்டர்படையில்லை... சொந்த சமுதாயதிற்குள்ளும் பெரியளவில் ஆதரவில்லை... எந்தவிதமான அதிகாரப் பதவியும் இல்லை... ஆனால் மேற்குறிபிட்ட அனைத்தும் இருப்பவர்களால் சாதிக்க முடியாத பலவற்றை சாதித்த தனிமனித இராணுவம்தான் பழனிபாபா...
palanibaba_340கண்ணியத் தலைவர் காயிதே மில்லத் அவர்களின் மறைவிற்குப் பிறகு தமிழக இஸ்லாமிய சமுதாயத்தின் எதிர்பார்ப்புகளை, உரிமைகளை அரசுக்குக் கொண்டு செல்லக்கூடிய வீரியமான தலைமை வெற்றிடமாகிப் போனபோது... முஸ்லிம்களுக்கு எதிராக சங் பரிவாரங்கள் தங்களது கட்டுக்கதைகளை கட்டவிழ்த்துவிட்டபோது தட்டிக் கேட்க யாருமே இல்லையா என்கிற ஏக்கப் பொருமல்கள் முஸ்லிம் சமுதாய சாமானிய மக்களிடம் பரவிவந்தபோது, தனது வீரியமான வீரமான உரைகளால் தமிழக முஸ்லிம்களுக்கு குறிப்பாக இளைஞர்களுக்கு தைரியமூட்டியவர் பழனிபாபா.
"நாங்கள் கைபர் போலன் கணவாய் வழியாக ஆடுமாடுகளை ஒட்டிக்கொண்டு இந்திய தேசத்திற்குள் அத்துமீறி நுழைந்த கூட்டமல்ல... இந்த மண்ணின் மைந்தர்கள்... ஆரிய அடிமைத்தன‌த்தில் இருந்து எம்மக்களை மீட்டெடுக்க இஸ்லாம் என்கிற மார்க்கத்தைத்தான் நாங்கள் இறக்குமதி செய்துகொண்டோம். மாறாக நாங்களே இறக்குமதி செய்யப்பட்ட மக்கள் அல்ல..." என வீரியமாக முழங்கி இஸ்லாமிய மக்களின் இந்தியப் பற்றை பறைசாற்றியவர் பழனிபாபா. செல்வச்செழிப்பான குடும்பத்தில் பிறந்திட்டபோதும் தன்னைச் சுற்றி நடக்கும் அநீதிகண்டு வெகுண்டெழுந்து சுகபோக வாழ்க்கையைத் துறந்தவர். முஸ்லிம்களுக்கு எதிராக பின்னப்படும் சதிவலைகளுக்கு சொந்தகாரர்கள் யார் என்பதைத் துல்லியமாகக் கண்டறிந்து களமாடினார் பழனிபாபா.
ஆம். பார்ப்பனியம் மட்டுமே முஸ்லிம்களுக்கு எதிரி; ஆரியம் மட்டுமே முஸ்லிம்களை இந்திய நாட்டின் வெகுஜன மக்களிடமிருந்து பிரித்தாள‌க்கூடிய சூழ்ச்சிகளை முன்னெடுக்கிறது என்பதை பாமரமக்களும் அறியும்வண்ணம் அழகாக தனது பாணியில் எடுத்துரைத்தார். விளைவு பார்ப்பனர்கள் தவிர்த்து தமிழர்கள் பழனிபாபாவை ஏற்றுக்கொள்ளத் துவங்கினார்கள். தந்தை பெரியார் மீதுகொண்ட பற்றால், அறிஞர் அண்ணாவின் கொள்கைகளில் கொண்ட ஈர்ப்பால் தன்னை அறிவிக்கப்படாத திமுக பேச்சாளராகவே ஆரம்பகாலத்தில் அடையாளப்படுத்திக் கொண்டார் பழனிபாபா. கலைஞர் கருணாநிதியின் தலைமைத்துவம் முஸ்லிம்களை கிள்ளுக்கீரையாகப் பயன்படுத்துகிறது என்பதை அறிந்து திமுகவின் துரோகத்தை அன்றே முழங்கி அமரர் எம்ஜிஆரின் அதிமுகவிற்கு ஆதரவானார்.
ஆரம்பகாலத்தில் அமரர் எம்ஜிஆரால் பெரிதும் மதிக்கப்பட்டவர்களில் பழனிபாபா அவர்களுக்குத் தனி இடமுண்டு. அமரர் எம்ஜிஆர் அவர்களுக்கு திமுகவினால் ஏற்ப்பட்ட பல சோதனைகளில் இருந்து விடுபட பழனிபாபா உதவினார் என்பது மறைக்கமுடியாத உண்மை. ஒரு கட்டத்தில் அமரர் எம்ஜிஆர் தனது ஆரிய விசுவாசத்தை வெளிக்காட்டத் துவங்கினார். சென்னை ஈகா திரையரங்க சாலையில் இந்து முன்னணியின் துவக்கவிழா நடைபெற்றது. அப்போது பேசிய அமரர் எம்ஜிஆர் "முஸ்லிம்களுக்கு முஸ்லிம் லீக் இருக்கும்போது இந்துக்களுக்கு இந்து முன்னணி அவசியம்" என்றார். அதனை வன்மையாகக் கண்டித்த பழனிபாபா எம்ஜிஆருடனான தனது உறவை முறித்துக்கொண்டார்.
தனது நாவன்மையின் மூலமாக அமரர் எம்ஜிஆரின் ஆற்றாமைகளை தமிழக மக்களிடம் தோலுரித்தார். விளைவு அதிமுகவின் ஆட்சி அடக்குமுறைகளினால் பழனிபாபா பலவழிகளிலும் பழிவாங்கப்பட்டார். இருப்பினும் தனது நிலையில் மிக உறுதியாகக் களமாடினர். எம்ஜிஆர் அவர்களே பழனிபாபா அவர்களின் செயல்களால் அச்சப்பட்ட காலங்களும் உண்டு. அந்த அச்சங்களின் காரணமாக பலமுறை பழனிபாபா பொய் வழக்குகளால் கைது செய்யப்பட்டு சிறையில் அடைக்கப்பட்டார். அவருக்கு எதிராக வாய்ப்பூட்டு சட்டங்கள் நிறைவேற்றப்பட்டன. அரசு அலுவலகங்களுக்குள் பழனிபாபா நுழைய அனுமதி மறுக்கப்பட்டது. எந்த சூழலிலும் தனது போர்க்குணத்தை இழக்காத பழனிபாபா எவருடனும் சமரசமில்லாத வீரத்தால் முஸ்லிம்கள் மட்டுமல்லாது ஏனைய பிற்படுத்தப்பட்ட தாழ்த்தப்பட்ட சமூகமக்களால் பெரிதும் ஈர்க்கப்பட்டார். திமுகவின் துரோகம், அதிமுகவின் நம்பிக்கை மோசடி இவற்றை முறியடிக்க பிற்படுத்தப்பட்ட, தாழ்த்தப்பட்ட மக்களுடன் கைகோர்த்தார். அவ்வேளையில் அண்ணல் அம்பேத்கரையும் தந்தை பெரியாரையும் அரசியல் குறியீடாகக் கொண்டு களமிறங்கிய மருத்துவர் இராமதாஸ் பழனிபாபா அவர்களின் முழுமையான அன்பைப் பெற்றார்.
மருத்துவர் இராமதாஸ் அவர்களால் முன் மொழியப்பட்ட தாழ்த்தப்பட்ட, பிற்படுத்தப்பட்ட மக்களின் அரசியல் பழனிபாபா அவர்களை வெகுவாக கவர்ந்தது. வடக்கே வன்னியர்கள்... தெற்கே தேவேந்திரர்கள்... பரவிவாழும் முஸ்லிம்கள் இணைந்தால் ஆட்சியையும் அதிகாரத்தையும் நம்மால் கைப்பற்ற முடியும் என்று பாட்டாளி மக்கள் கட்சி கொள்கைப் பிரகடனம் செய்தது பழனிபாபா அவர்களால்தான். முன்னைவிடவும் வீரியமாக பாமகவின் வளர்ச்சிக்கு களமாடினர் பழனிபாபா. பெருவாரியான முஸ்லிம்களும் தலித்துக்களும் பாமகவில் அங்கம்பெறக் காரணமே பழனிபாபா அவர்களின் எழுச்சிகரமான பரப்புரைகள்தான் என்பதை எவரும் மறுக்க முடியாது.
பழனிபாபா தனது மார்க்கத்தில் தெளிவான நிலைப்பாடு கொண்டவர். எத்தகைய கடவுள் மறுப்பு கூட்டமானாலும் இஸ்லாத்தின் புனிதத்தன்மையை எடுத்துச் சொல்ல தயங்கியதில்லை. ஆனால் ஒரு குறுகிய வட்டத்திற்குள் தன்னையும் தனது சமூகத்தையும் அடைத்துக் கொள்ள அவர் விரும்பவில்லை... நாம் வாழக்கூடிய நாட்டில் வெகுஜன மக்களுடன் கலந்து புரிந்துணர்வுடன் அதே வேளையில் இஸ்லாமிய கோட்பாடுகளில் எவ்விதமான சமரசத்திற்கும் இடமில்லாமல் வாழ அரசியல் பொருளாதாரம் போன்ற துறைகளில் முக்கியத்துவம் பெறக்கூடிய வழிமுறைகளை கற்றுத்தந்தவர் பழனிபாபா...
சமஷ்கிருத மொழியின் முகமூடியில் பார்ப்பனர் இல்லாத மக்கள் எப்படியெல்லாம் கீழ்த்தரமாக நடத்தபடுகிறார்கள், பார்ப்பனர்களால் பிறப்பால் வளர்ப்பால் அசிங்கப்படுத்தப்படுகிறார்கள் என்பதையெல்லாம் பட்டியலிட்டு பகிரங்கப்படுத்தியவர் பழனிபாபா என்பது மறைக்கப்பட்ட உண்மை. தாழ்த்தப்பட்ட சமூகமக்களின் விடுதலைக்காக அவர்களது மறுக்கப்பட்ட உரிமைகளுக்காக எந்தவிதமான எதிர்பார்ப்புமில்லாமல் செயல்பட்ட பழனிபாபா அவர்களால் ஈர்க்கப்பட்டுதான் ஜான்பாண்டியன், பசுபதி பாண்டியன் போன்றோரெல்லாம் பாமகவில் இணைந்தார்கள். வழக்கப்படியே பாமகவும் பழனிபாபா அவர்களுக்கு... இல்லை இல்லை முஸ்லிம்களுக்கும் தாழ்த்தப்பட்ட மக்களுக்கும் துரோகம் இழைத்தது. எப்போதும் இல்லாத வகையில் பழனிபாபா கவலைகொண்டார். காரணம் பாமகவை திமுக அதிமுகவைவிட அதிகமாக நம்பினார். பாமக நேரடியாகவே இந்துத்துவ சக்திகளுடன் நட்புகொண்டது பழனிபாபா அவர்களை கவலைக்குள்ளாகியது.
மாற்று அரசியலை சிந்திக்கவேண்டிய கட்டாயத்திற்கு பழனிபாபா பாமகவினால் கொண்டு செல்லப்பட்டார். அதற்கு தற்போதைய சாட்சியங்கள் நிறைய உண்டு... தேவைப்பட்டால் வெளிப்படுத்துவோம். தலித் மக்கள் ஆதிக்க சக்திகளால் தாழ்த்தப்பட்டார்கள். முஸ்லிம்கள் ஆதிக்க சக்திகளின் அச்சுறுத்தலால் தங்களைத் தாங்களே தாழ்த்திக் கொண்டார்கள். ஆக தாழ்த்தப்பட்டவர்களும்... தாழ்த்திக்கொண்டவர்களும் ஒருங்கிணைந்தால் மட்டுமே இத்தகைய துரோகங்களை வென்றெடுக்க முடியும் என்கிற தெளிவான மனநிலைக்கு பழனிபாபா வந்தார்.
முஸ்லிம்களின் மிகப்பெரிய கட்டமைப்பான முஹல்லாஹ் ஜமாத்துக்களை கூட்டமைப்பாக உருவாக்கும் முயற்சிகளை முன்னெடுத்தார். அதே வேளையில் ஜான்பாண்டியன், பசுபதி பாண்டியன் போன்றவர்கள் மூலமாக தலித் மக்களை ஒருங்கிணைக்கவும் செயல்திட்டங்களை வகுத்தார். ஒவ்வொரு ஊருக்கும் தானே தனிமனிதனாக சென்றார். முஸ்லிம்களின் முஹல்லாஹ் ஜமாஅத் நிர்வாகிகளை சந்தித்தார். தனது திட்டங்களை சொன்னார். ஏற்றுக்கொண்டார்கள்; இணைந்து களமாட தயாரானார்கள். தலித் மக்களை சந்தித்தார். இழிநிலை நீங்க சிறப்பான செயல்திட்டங்களை சொன்னார். தலித் மக்கள் பழனிபாபா அவர்களின் பின்னால் அணிவகுக்கத் தயாரானார்கள். தேர்தல் அரசியலை புறக்கணித்து தீவிரமாக மக்கள் விடுதலைக்காக களமாடிய திருமாவளவன் பழனிபாபா அவர்களின் கவனத்தை ஈர்த்தார். அவரையும் அழைத்து ஆலோசனைகளை மேற்கொண்டார். வெண்ணை திரண்டு வந்தது; ஆனால் பழனிபாபா என்கிற தாளி சமூகவிரோதிகளால் உடைக்கப்பட்டது.
ஆம்... ஒடுக்கப்பட்டோரும் ஒதுக்கப்பட்டோரும் ஒருங்கிணைந்து அதிகாரத்தை வென்றெடுப்போம் என்ற சமூகப்புரட்சியாளர் பழனிபாபா அவர்களின் கோஷம் ஆதிக்க சக்திகளின் உறக்கத்தை கெடுத்தது. பழனிபாபா என்கிற மாமனிதன், தனிமனிதப் போராளி படுகொலை செய்யபட்டார். சுமார் 238 வழக்குகள், 136 கைதுகள், 124 சிறைகள் இவற்றை எல்லாம் கடந்து மக்களின் உரிமைகளுக்காக கடைசி நிமிடம் வரை குரல்கொடுத்த ஒரு மாவீரன் கோடாளிகளால் குடல்சரிக்கப்பட்டு கொல்லப்பட்டார். தடா வழக்குகளில் சிறைபடுத்தப்படாமலேயே வழக்கை தவிடுபொடியாக்கிய வரலாறு பழனிபாபா என்கிற ஆளுமையற்ற அதிகாரமற்ற ஒரு தனிமனிதனால் மட்டுமே சாத்தியமானது... காரணம் பழனிபாபா என்றால் சத்தியம் உண்மை நேர்மை..
.
பழனிபாபா என்கிற தனிமனிதனை ஒழித்துவிட்டால் சாதியம் தழைத்தோங்குவதற்கான தடை அகற்றப்பட்டுவிடும்... முஸ்லிம்கள் முடங்கிவிடுவார்கள்... என்று மனப்பால் குடித்த கயவர்கள் இன்றைக்கு கலங்கிப் போய் நிற்கிறார்கள்... காரணம் ஒரு பழனிபாபாவை கொலைசெய்தார்கள்.... ஆனால் அவர் புதைக்கப்பட்ட இடத்தில் இருந்து பல்லாயிரக்கணக்கான பழனிபாபாக்கள் முளைத்து வந்துவிட்டார்கள்...
பழனிபாபா அவர்களின் வார்த்தைகள்தான் இன்றைக்கு முஸ்லிம் மற்றும் தாழ்த்தப்பட்ட சமூக இளைஞர்களின் ஜீவ முழக்கம். இனத்தால் திராவிடர்கள்... மொழியால் தமிழர்கள்... தேசத்தால் இந்தியர்கள்... ஏற்றுக்கொண்ட மார்க்கத்தால் மட்டுமே நாங்கள் முஸ்லிமகள்... இது பழனிபாபா அவர்களின் கொள்கைப் பிரகடனம்... ஏற்க மறுப்பது அறீவீனம்...
மனிதனை மனிதனாக மாற்ற முயற்சித்த தந்தை பெரியாரை, அடிமை விலங்கை உடைக்க அரும்பாடுபட்ட அண்ணல் அம்பேத்கரை வாசித்த தமிழர்கள் பழனிபாபா என்கிற வரலாறையும் வாசிக்க வேண்டியது காலத்தின் கட்டாயம்.

சனவரி 28, மாமனிதர் பழனி பாபாவின் நினைவு நாள்.....

புரட்சியாளர் பழனிபாபா. 1988 ஆம் ஆண்டு... அமெரிக்காவிலுள்ள பிலடெல்பியா பெல்லோஷிப் பல்கலைக்கழகத்தின் டெல்டா அரங்கு நிரம்பி வழிந்தது. பெருங்கூட்டத்திற்கு நடுவே கம்பீரமாக எழுந்து நின்று உரையாற்றினார், அந்த இளம் தமிழர். 13 மணி நேரம் அவர் ஆற்றிய தொடர் சொற்பொழிவில் அமெரிக்கர்கள் சொக்கிப்போனார்கள். . அவரது கருத்துக்களால் ஈர்க்கப்பட்ட அமெரிக்கர்கள் பலர் குடிப்பதை மறந்தார்கள்; தீய பழக்கங்களை விட்டு விலகினார்கள்; ஒழுக்கவியலை நோக்கி நகர்ந்தார்கள்; இறுதியில் இஸ்லாத்தை தங்களின் வாழ்வியல் நெறியாக ஏற்றுக்கொண்டார்கள். தமது ஒரு சுற்றுப்பயணத்திலேயே இப்படியொரு அழுத்தமான தாக்கத்தையும், ஆக்கப்பூர்வமான மாற்றத்தையும் ஏற்படுத்திக்காட்டிய அந்த இளம் தமிழர் வேறு யாருமல்ல; அவர்தான் புரட்சியாளர் பழனிபாபா. 1997, ஜனவரி 28 ஆம் நாள் பழனிபாபா படுகொலை செய்யப்பட்டார். 'நான் வாழ வந்தவனல்ல; மாள வந்தவன்' என்று செல்லுமிடமெல்லாம் முழங்கிய அவர் சொன்னது போலவே மாண்டுபோனார். அவர் மறைந்து இன்றோடு 14 ஆண்டுகள் கடந்து விட்டன. அவருக்கு எமது வீர வணக்கங்கள்

சனவரி 28, மாமனிதர் பழனி பாபாவின் நினைவு நாள்.....

பழனி பாபா, இந்த மாமனிதரை ஒரு மார்கத்தினுள் மட்டும் அடக்கி விட முடியாது, ஒடுக்கப்பட்ட மக்களுக்காக போராடியவர், சாதி, மதம் மற்றும் பிற கருத்து வேறுபாடுகளை கடந்து உண்மை தமிழர்களை ஒன்றிணைக்க பாடுபட்டவர். 

இவர் படுகொலை செய்யப்பட்டது இவர் மார்க பரப்புரை செய்ததற்காக அல்ல, நம்மை முட்டாள்களாக்கி அடக்கி ஆண்டுவரும் கூட்டத்தின் முகத்திரையை கிழித்ததற்காக..

அன்று பழனி பாபாவை வெட்டி வீழ்த்தியபோது வாய்மூடி வேடிக்கை பார்த்ததால் தான், இன்று பெரியாரையும் அறுத்திருப்போம் ஏனைய தமிழர் தலைவர்களையும் அறுப்போம் என்று ஆரியக் கூட்டத்தால் துணிச்சலாக தமிழ் மண்ணில் நின்று பேசமுடிகிறது.

"அரசியல் தளத்தில் நாம் அனைவரும் ஒன்றாக இருப்போம், நமது மற்ற பிரச்சனைகளை நாமே பேசி தீர்த்துக்கொள்வோம்" என்ற இம்மனிதனின் முழக்கம் ஏனோ இன்றுவரை தமிழக மக்களின் காதுகளுக்கு எட்டவே இல்லை.

தமிழர்களே நமக்குள் ஆயிரம் பிரச்சனைகள் இருக்கலாம், கண்திறந்து பாருங்கள் நிச்சயம் அவை அனைத்தும் ஆரிய கூட்டம் வேரூன்றி விட்டதாகத்தான் இருக்கும். அவற்றை நாமே தீர்த்துக்கொள்வோம். துரோக கூட்டத்திடம் மீண்டும் மீண்டும் அடிமையாகாதீர்கள்.

திங்கள், 27 ஜனவரி, 2014

கூட்டணி அறிவிப்புக்கு முன்பே தொகுதியில் களம் இறங்கிய கிருஷ்ணசாமி..

பாராளுமன்ற தேர்தலில் தி.மு.க. அணியில் புதிய தமிழகம் இடம்பெறுவது உறுதியாகி விட்டது. அக்கட்சிக்கு தென்காசி தொகுதி ஒதுக்கப்படும் எனவும் கூறப்படுகிறது. இருப்பினும் அதிகார பூர்வமாக தி.மு.க. தரப்பில் அறிவிக்கப்படவில்லை.
இந்நிலையில் தென்காசி தொகுதி தங்களுக்கு ஒதுக்கப்பட்டு விட்டதை போன்று அக்கட்சியினர் தேர்தல் பணியையே தொடங்கி விட்டனர். தென்காசி மக்களவை தொகுதிக்குட்பட்ட புதிய தமிழகம் கட்சியின் புதிய நிர்வாகிகள் பதவியேற்பு விழா மற்றும் பாராட்டு விழா கூட்டம் தென்காசியில் நடைபெற்றது.
கூட்டத்துக்கு தலைமை வகித்து கட்சி தலைவர் டாக்டர் கிருஷ்ணசாமி பேசியபோது, ’’நம் கட்சியினர் கூட்டணி கட்சியினரோடு இப்போதே நல்ல தொடர்பை ஏற்படுத்தி கொள்ள வேண்டும். இதுவரை இந்த தொகுதியிலிருந்து வெற்றி பெற்று பாராளுமன்றத்திற்கு சென்றவர்களால் இந்த தொகுதிக்கு எந்தவிதமான பயனும் ஏற்படவில்லை என்பதை அனைத்து தரப்பு மக்களும் உணர்ந்துள்ளனர்.
எனவே, புதிய தமிழகம் கட்சி வெற்றி பெற்றால் மட்டுமே இந்த தொகுதியின் தேவைகள் அனைத்தையும் நிறைவேற்ற முடியும் என அனைத்து தரப்பினரும் நம் மீது நம்பிக்கை வைத்துள்ளனர். கிளை செயலாளர்கள், புதிய நிர்வாகிகள் உடனடியாக வாக்காளர் பட்டியலை வீடு வீடாக சென்று சரி பார்க்க வேண்டும்’’ என்றார்.

''ஜெயலலிதா பிரதமர் பதவிக்குத் தகுதியானவரா?'' டாக்டர் கிருஷ்ணசாமியின் அதிரடி பதில்..

  • ''ஜெயலலிதா பிரதமர் பதவிக்குத் தகுதியானவரா?''  டாக்டர் கிருஷ்ணசாமியின் அதிரடி பதில்



''தி.மு.க. ஆட்சியின் மீது பல குற்றச்சாட்டுகள் சொல்லப்பட்டன. அதற்கு மாற்றாக அ.தி.மு.க. அமையும் என்றுதான் அந்தக் கூட்டணியில் புதிய தமிழகம் அங்கம் பெற்றது. ஆனால், அந்த எதிர்பார்ப்புகள் எதையும் அ.தி.மு.க. நிறைவேற்றவில்லை. தி.மு.க. ஆட்சியில் கனிம வளங்கள் கொள்ளையடிக்கப்படுவதாகப் புகார் கிளம்பியது. இப்போது அ.தி.மு.க. ஆட்சியில் மணல் கொள்ளை தொடர்ந்துகொண்டுதானே இருக்கிறது? அ.தி.மு.க. ஆட்சியில் எந்த மாற்றமும் இல்லை. தி.மு.க. ஆட்சியைவிட பல மடங்கு மோசமாகிவிட்டது''- நாடாளுமன்றத் தேர்தலில் தி.மு.க-வுடன் கூட்டணியை உறுதிசெய்திருக்கும் புதிய தமிழகம் கட்சியின் தலைவர் டாக்டர் கிருஷ்ணசாமியை சந்தித்தபோதுதான் இப்படி ஆரம்பித்தார்.
 ''அ.தி.மு.க-வைவிட தி.மு.க. பரவாயில்லை என்பதால்தான் தி.மு.க-வுக்குப் போனீர்களா?''
''அப்படிச் சொல்ல முடியாது. ஒவ்வொரு கட்சிக்கும் சில கொள்கைகளும் கோட்பாடுகளும் எதிர்பார்ப்புகளும் இருக்கும். புதிய தமிழகத்துக்கும் அப்படித்தான். தென் தமிழகத்தில் பிரதானமாக உள்ள பள்ளர்கள் எனும் தாழ்த்தப்பட்ட சமுதாய மக்கள், தங்களை தேவேந்திர குல வேளாளர்கள் என அழைத்திட வேண்டும் என, தொடர்ந்து கோரிக்கை வைத்து வருகின்றனர். தேர்தல் கூட்டணிக்கு முன்பாக ஜெயலலிதாவை அவரது இல்லத்தில் சந்தித்தபோது, இந்தக் கோரிக்கையை நிறைவேற்ற வேண்டும் என்றுதான் வலியுறுத்தினோம். ஆட்சிக்கு வந்து இரண்டு ஆண்டுகள் நிறைவடைந்தும் ஜெயலலிதா எங்கள் கோரிக்கையை நிறைவேற்றவில்லை.
சங்கரன்கோவில் இடைத்தேர்தலுக்கு முன்பாக புதிய தமிழகத்தின் ஆதரவு தேவை என அ.தி.மு.க. தலைமை அழைத்து கேட்டபோதுகூட, 'ஏற்கெனவே தேர்தல் நேரத்தில் கொடுத்த வாக்குறுதியை நிறைவேற்றாத காரணத்தால் தென் தமிழக மக்கள் கடும் கோபத்தில் உள்ளனர். எனவே அந்தக் கோரிக்கையை நிறைவேற்றுங்கள்’ என்று கேட்டுக்கொண்டேன். 'தேர்தல் விதிமுறைகள் அமலில் உள்ள காரணத்தால் அதை இப்போது நிறைவேற்ற முடியாது. தேர்தல் முடிந்தவுடன் அறிவிக்கிறேன்’ என்று சொன்னார். அந்த நம்பிக்கையில்தான் சங்கரன்கோவில் சட்டமன்றத் தேர்தலில் அ.தி.மு.க. வேட்பாளரை ஆதரித்துப் பிரசாரம் செய்தோம். அவரை வெற்றிபெற வைத்தோம். அதற்குப் பிறகும் எங்கள் கோரிக்கையை அவர்கள் கண்டுகொள்ளவே இல்லை. அப்புறம் எப்படி அவர்களுடன் கூட்டணியைத் தொடர முடியும்?
நாடாளுமன்றத் தேர்தலில் தி.மு.க. கூட்டணியில் இணைவதன் மூலமாக ஒடுக்கப்பட்ட மக்களுக்கான பல்வேறு விதமான பிரச்னைகளை நாடாளுமன்றத்தில் எழுப்ப முடியும். தென் தமிழக மக்களின் குரல் நாடாளுமன்றத்தில் ஓங்கி ஒலிக்கும்.''
''நாடாளுமன்றத் தேர்தலில் எத்தனைத் தொகுதியில் உங்கள் கட்சி போட்டியிட வாய்ப்பு இருக்கிறது?''
''தி.மு.க. கூட்டணியில் நாங்கள் மட்டும் இல்லாமல் இன்னும் பல ஜனநாயக சக்திகளை இணைத்து, இந்தக் கூட்டணியை வலுவான வெற்றிக் கூட்டணியாக மாற்ற நாங்கள் நடவடிக்கை எடுத்து வருகிறோம். எனவே, எண்ணிக்கை பற்றியெல்லாம் இப்போது பேச முடியாது. எங்கள் கட்சி பொதுக்குழுவில் இதுபற்றி விவாதித்து முடிவெடுக்கப்படும்.''
''திருமாவளவனும் நீங்களும் ஒரே அணியில் இடம்பெற்றுள்ளீர்கள்...''
(கேள்வியை முடிப்பதற்கு முன்பே குறுக்கிட்டு...) ''நாங்கள் அன்றும் ஒன்றாகத்தான் இருந்தோம். இன்றும் ஒன்றாகத்தான் இருக்கிறோம். பார்ப்பவர்களின் பார்வைதான் இரண்டாக இருக்கிறது. நாங்கள் தொடர்ந்து சந்திக்கிறோம். பேசுகிறோம். எங்களுக்குள் எந்தப் பிரச்னையும் எப்போதும் இருந்ததே இல்லை. இப்போது ஒரே அணியில் இருக்கிறோம். விரைவில் ஒரே இயக்கமாகவும் மாறுவோம்.'
''தி.மு.க. மீது பல்வேறு குற்றச்சாட்டுக்கள் உள்ள நிலையில், அவர்களுடன் கூட்டணி சேர்ந்துள்ளீர்கள். இதை எப்படி எதிர்கொள்ளப் போகிறீர்கள்?''
''இந்தியாவில் ஊழல் குற்றச்சாட்டுக்கு ஆளாகாத எந்தப் பிரதான கட்சிகளும் இல்லை. பாரதிய ஜனதா கட்சி ஊழல் குற்றச்சாட்டுக்கு உள்ளாகிதான் முன்பு ஆட்சியை இழந்தது. ஊழல் குற்றச்சாட்டு என்பது வேறு; குற்றம் நிரூபிக்கப்படுவது என்பது வேறு. கட்சியில் இருக்கும் சிலர் மீது புகார் கிளம்பும். வழக்குப் பதிவுசெய்யப்படும். நீதிமன்றத்தில் விசாரணை நடக்கும். பிறகு, விடுதலை ஆவார்கள். இது தொடர்கதைபோல நடக்கும் விஷயம். ஆனால், ஒரு கட்சியையே குற்றவாளிக் கூண்டில் நிறுத்த முடியாது!''
''ஜெயலலிதா பிரதமர் பதவிக்குத் தகுதியானவரா?''
''இந்திய அளவில் மாற்றம் வேண்டும் என அவர் நினைக்கிறார்; பேசுகிறார். அவர் நினைக்கும் மாற்றத்தை முதலில் தமிழக அளவில் நிகழ்த்தியிருக்க வேண்டும். அந்த மாற்றம் இந்திய அளவிலான மாற்றத்துக்கு வலு சேர்த்திருக்கும். தமிழகத்திலேயே எந்த மாற்றத்தையும் உருவாக்காதபோது, எப்படி இந்திய அளவில் மாற்றத்தை உருவாக்கிவிட முடியும்? 'கூரை ஏறி கோழிப் பிடிக்க முடியாதவன், எப்படி வானம் ஏறி வைகுண்டம் போகப்போறான்?’ என்று கிராமத்துப் பக்கம் ஒரு பழமொழி சொல்வார்கள். ஜெயலலிதா சொல்வதும் அப்படித்தான் இருக்கிறது!''

புதிய தமிழகம் கட்சி கிளைப் பொறுப்பாளர்கள் பதவியேற்பு மற்றும் பாராட்டு விழா!

புதிய தமிழகம் கட்சியின் தென்காசி நாடாளுமன்றத் தொகுதி புதிய கிளைப் பொறுப்பாளர்கள் பதவியேற்பு மற்றும் பாராட்டு விழா 26.01.2014 அன்று தென்காசி இசக்கி மஹாலில் தன்மான தானைத் தலைவர் டாக்டர் அய்யா அவர்கள் தலைமையில் நடைபெற்றது. இக்கூட்டத்தில் தென்காசி, கடையநல்லூர், வாசுதேவநல்லூர், சங்கரன்கோவில், ராஜபாளையம், திருவில்லிப்புத்தூர் ஆகிய ஆறு சட்டமன்றத் தொகுதியில் உள்ள கிராமங்களைச் சேர்ந்த சுமார் 6000 கிளை, இளைஞரணி, மகளிரணி பொறுப்பாளர்கள் பதவியேற்றுக் கொண்டனர்.

வெள்ளி, 24 ஜனவரி, 2014

திருச்சி சிவாவுக்கு டாக்டர் கிருஷ்ணசாமி ஆதரவு..



 

மாநிலங்களவை தேர்தலில் திமுக சார்பில் திருச்சி சிவா போட்டியிடுவதாக திமுக தலைவர் கலைஞர் அறிவித்தார்.   திமுகவுக்கு புதிய தமிழகம் கட்சி ஆதரவளிக்கும் என்று கூறினார் புதிய தமிழகம் கட்சியின் தலைவர் டாக்டர் கிருஷ்ணசாமி.
இதையடுத்து சென்னையில் இன்று டாக்டர் கிருஷ்ணசாமியை அவரது கட்சி அலுவலகத்தில் சந்தித்து ஆதரவு கேட்டார் திருச்சி சிவா.