பார்ப்பனிய சாதி ஒடுக்குமுறைகளை எதிர்த்து தீரத்துடன் போராடிய இமானுவேல் சேகரன்

            சாதி ஒழிப்புப் போராளி இமானுவேல் சேகரன் - 1924 அக்டோபர் 9 ஆம் தேதி, முகவை மாவட்டம் செல்லூரில் வேதநாயகம் என்ற ஆசிரியருக்கு மகனாக பிறந்த அவர் – பள்ளி இறுதி வகுப்பை முடித்து சில ஆண்டுகள் இராணுவத்தில் பணியாற்றி ஊர் திரும்பினார்: தென்மாவட்டங்களில் – பார்ப்பனியத்தில் ஊறிப்போய் – சாதி ஆதிக்க வாதிகள் –தேவேந்திரர்கள் மீது ஏராளமான சாதி அடிமைக் கட்டளைகளைப் பிறப்பித்திருந்த காலம் அது;

      அன்று முகவை மாவட்டங்களில் சாதி ஆதிக்க சக்திகள் முத்துராமலிங்க தேவர் தலைமையில் அணிதிரண்டு நின்றனர். முத்துராமலிங்க தேவர் பார்வர்டு பிளாக் கட்சியின் முக்கிய தலைவர்; அவரை எதிர்த்து, பச்சைத் தமிழர் காமராசர் வழி நடத்திய காங்கிரஸ் கட்சிக்குள் தன்னை இணைத்துக்கொண்டு – பார்ப்பனிய சாதி ஒடுக்குமுறைகளை எதிர்த்து தீரத்துடன் போராடினார் இமானுவேல் சேகரன்.

      மறவர் சமூகம் – தேவேந்திரர் மக்கள் மீது திணித்த அடிமைக் கட்டளைகளை இமானுவேல் சேகர் தலைமையில் திரண்ட மக்கள் ஏற்க மறுத்தனர்; தேனீர்க்கடைகளில் – இரட்டை டம்ளர் – இருக்கையில் அமரத் தடை போன்ற ‘அவலங்களை’ நேருக்கு நேர் எதிர்த்துப் போராடினார் இமானுவேல் சேகரன்.

       1957 ஆம் ஆண்டு பொதுத் தேர்தலில் ஸ்ரீவில்லிபுத்தூர் – முதுகுளத்தூர் தேர்தல்களில் முத்துராமலிங்க தேவரை எதிர்த்து – இமானுவேல் சேகரன் – காங்கிரஸ் கட்சிக்காக – மக்களை அணி திரட்டியதால் ஆத்திரம் அடைந்த முத்துராமலிங்க தேவரின் சாதி ஆதரவாளர்கள் கலவரத்தைத் தொடங்கினர் – இமானுவேல் சேகரன் தலைமையில் திரண்ட ஒடுக்கப்பட்ட மக்கள் துணிவோடு எதிர்த்து நின்றனர்.

      முத்துராமலிங்க தேவர் – இமானுவேல் சேகர் ஆகிய இரு தரப்பினரையும் அழைத்து இராமநாதபுரம் மாவட்ட ஆட்சித் தலைவர், முதுகுளத்தூர் தாலுக்கா’ அலுவலகத்தில் சமரசப் பேச்சு நடத்தினார். ஆங்கிலம், ரஷ்ய மொழி உட்பட 7 மொழிகள் அறிந்தவர் இமானுவேல் சேகரன்; தமது மக்கள் மீது சுமத்தப்பட்ட குற்றச்சாட்டுகளை ஆணித்தரமாக மறுத்தார் இமானுவேல்; ஆங்கிலப் புலமை மிக்க முத்துராமலிங்க தேவர் ஆங்கிலத்தில் பேசிய போது அவருக்கு அதே மொழியில் பதிலளித்தார் இமானுவேல்; தங்களுக்கு சமமாக – ஒரே இடத்தில் ஒன்றாக திரண்டு – சமநிலையில் வாதாடும் நிலைக்கு ஒடுக்கப்பட்ட சமூகம் அணிதிரண்டு வாதாடியதை ஆதிக்க சாதியினரால் ஏற்க முடியவில்லை. இந்த சமரசப் பேச்சுக் கூட்டம் நடந்த நாள் - 1957 செப்டம்பர் 10:

     அடுத்த நாள் செப்டம்பர் 11 ஆம் தேதி பரமக்குடியில் – தனது இல்லத்தின் அருகே – இரவு 8-30 மணியளவில் இமானுவேல் சேகரன் வெட்டி கொலை செய்யப்பட்டார்; அப்போது அவருடைய வயது 33.

      முதுகுளத்தூரில் பெரும் கலவரம் வெடித்தது ; அக்கால கட்டத்தில் – முத்துராமலிங்க தேவரின் பின்னால் – வலிமையான சாதி ஆதிக்க வாதிகள் இருந்த நிலையில் – எந்த ஒரு கட்சியும் – ஒடுக்கப்பட்ட தலித் சமூகத்தினருக்கு குரல் கொடுக்க தயாராக இல்லை.

       பெரியாரும் ‘விடுதலை’ நாளேடும் மட்டும் தான் – உறுதியாக – சாதி ஆதிக்க சக்திகளை கடுமையாக ஒடுக்க வேண்டும் என்று குரல் கொடுத்தது. கலவரத்தில் ஈடுபடும் சமூக விரோதிகளை அரசு கடுமையாக ஒடுக்க வேண்டும் என்று காமராசர் ஆட்சிக்கு வேண்டுகோள் விடுத்த பெரியார்,  “ இல்லாவிட்டால் ஒடுக்கப்பட்ட மக்களின் சார்பில் நானே போராட்டத்தில் குதிப்பேன் ” என்று அறிக்கை விடுத்தார்: காந்தியாரின் கொள்கையில் தீவிரப் பற்றுக் கொண்டவரும் – முக்குலத்தோர் சாதியில் பிறந்தவருமான தினகரன் என்ற பத்திரிக்கையாளர் ஒடுக்கப்பட்ட மக்களுக்கு ஆதரவாக – சுயசாதி எதிர்ப்பாளராக மாறி – தனது பத்திரிகையில் எழுதியதால் – அவரது அலுவலகத்தை சூறையாடி அவரது சொந்த சாதியினரே, அவரைப் படுகொலை செய்தனர். சுயசாதி மறுப்பாளராக தீரத்துடன் போராடிய தோழர் தினகரனுக்கு வீரவணக்கம் செலுத்துவோம் !

     சாதி ஒழிப்புப் போராளி இமானுவேல் சேகரன் வரலாறுகள் – சாதி ஒழிப்புப் போரில் களத்தில் நிற்கும் போராளிகளூக்கு – வழிகாட்டும் ஒளி விளக்கு ! பெரியார் தடம் பதித்த – வரலாற்றுச் சுவடுகளில் தொடர்ந்து போராட, மாவீரன் இமானுவேல் சேகரன் நினைவு நாளில் – “திராவிடர் விடுதலைக் கழகம்” உறுதி ஏற்கிறது !